Sunday, May 12, 2013

An Gairdín go Nuige Seo


(5/10/20130

Níl ach píosa fíorbheag nach bhfuil treafa dí-charraigithe agam, píosa nach bhfuil ach 50 troigh cearnach ann, agus an chuid is mó de á húsáid mar láthair stórais d’adhmad tógála.

N’fheadar ar luaigh mé nach raibh mé sásta leis an leagan atá san Fhoclóir Talmhaíochta ar ‘dormant spray’ (‘sprae geimhridh’ atá acu air).  Sprae suanach an moladh sealadach a bhí ag Jenny Ní Chumhaill ón gCoiste Téarmaíochta dom.  Tá leasú déanta acu ar an moladh sin, leasú chun feabhais é.

dormant oil spray                            sprae m4 ola le linn suanachta

dormant spraying                            spraeáil f3 le linn suanachta

dormant oil spraying                       spraeáil f3 ola le linn suanachta

dormant spray                                 sprae m4 le linn suanachta

Seo mar atá an scéal inniu.  Seachas crann péitseoige nár tháinig fós, tá chuile bharr curtha:  piseanna, ionúin, leitís, biatais, raidisí, seallóidí, prátaí agus trátaí.  An fómhar seo caite chuir mé i dtalamh 20 giolcach breise sú craoibhe, agus cé mall roinnt díobh, dealraíonn go bhfásfaidh chuile cheann díobh.  San iomlán anois, tá 30 giolcach agam.  Chuile dhuine ag súil le subh, pióga agus coulis.   
I mbliana tá mé ag baint triail as arbhar buí, agus i gceapóg sa choill, morchal (morels).  Tá na crainn thorthaí uile i mbarr sláinte agus bláth, seachas crann beag amháin nár mhair an geimhreadh.  Crann piorra Áiseach ab ea é, crann ab éigean dom a athphlandáil an fómhar seo caite. 
Dearmad déanta agam ar chrann nua:  crann fige.  Is i dtalamh, seachas i bpota atá an crann seo ag fás agus beidh orm an-chúram a thabhairt dó má tá sé leis an ngeimhreadh a chur de.  Liosta fada treoracha faighte agam ón gcomhlacht a dhíol an crann liom. 
Más suim le haoinne agaibh tabhairt faoi na beacha láibe a thógáil, cuma cén tír ina bhfuil sibh, cuir r-phost chugam ag soconn1@comcast.net.  Tá treoracha agam anois agus féadaim ábhair tógála a mholadh agus, i gcás amháin, a sholáthar daoibh, ach costas an phoist a ghlanadh dom.

3 comments:

  1. traochta ag léamh seo! bail ó Mhor ort, agus nár laga sí do láimh i mbun oibre!

    ReplyDelete
  2. Céard, níl aon phuimcíní curtha agat!

    An-obair, a chara..:-)

    ReplyDelete
  3. Puimcíní:
    Tógann siad an t-uafás spáis, is ‘ba bradacha’ iad agus caitear a láthair fáis a athrú gach bliain. Ceannóidh mé a bheidh uaim, ach fásfaidh mé cúpla tulach scuaiseanna, ós iad is fearr múinte den chlann sin. Dála an scéil, tá beacha láibe agaibh in Éirinn, in ainneoin daoine a bheith aineolach fúthu. Má tá crann úll, piorra nó coll agat, b’fhiú duit an scéal a ghrinniú.

    ReplyDelete