Tuesday, January 15, 2013

An Bairín Breac


Le déanaí, agus an gairdín faoi fhuacht agus sneachta, dhírigh mé ar an gcócaireacht, ar dhéanamh anraithí de leithéid puimcín + curraí agus práta + cainneann.  Agus iad san curtha díom agam, (steirilithe agus ‘curtha suas’ agam), dhírigh mé ar rud nár éirigh liom riamh a dhéanamh go sásúil; an bairín breac.  Tá mé ag ceapadh nár bhlais mé den chíste sin ó d’fhág mé Éire sa bhliain 1965.  Ar ndóigh chuaigh mé á chuardach sna gnáth áiteanna, ach ní raibh teacht agam riamh ar oideas a shásaigh mé, mar cé nach raibh ach meath-chuimhne agam ar an mbairín, ar a bholadh agus ar a bhlas, bhí a fhios agam go raibh ar a laghad dhá rud riachtanach chun fíorbhairín a dhéanamh; giústa agus tae.  Ar ndóigh, bheadh rísíní agus comhábhair eile i gceist, ach in éagmais tae agus giosta ní bheadh teacht agam ar mo rún. 
Ní fadhb go seift.  Rinne mé turgnamh (faoi shé!) sa chistin agus geallaim daoibh go raibh torthaí an taighde thar a bheith míshásúil.  An deacracht?  Bhí an tainnin sa tae ag cur bac fáis ar an ngiosta.  OK, chaithfí an giosta a chur ag fás in éagmais an tae agus chaithfí an tae a chur leis an taos go déanach sa phróiseas.  Thairis sin, b’eol dom go gcuireann vitimín C borradh faoi fhás ghiosta agus chuir mé blúirín (250 mg) den vitimín leis an bplúr.  Agus seo daoibh, a chairde an toradh, faoi dheireadh.  ‘Blasta ar fad,'a deir An Cosantóir, agus dar liom féin?  ‘Sásúil.!!’


7 comments:

  1. Cuma an-deas air, go deimhin, a SheáinO!

    Ach, deacair do mharóga Nollag a shárú, ceapaim féin..;-)

    ReplyDelete
  2. Tá sé go hálainn ag breathnú! Dála an scéil, níl aon tae san oideas atá agam, as an leabhar A Taste of Ireland.

    ReplyDelete
    Replies
    1. Sin ceann de na fadhbanna. Dheara, A Taste of Ireland, mar dhea!!

      Delete
  3. ní dhearna muid féin báirín breac le giosta riamh (Béal Feirste). Císte seachas arán milis a bhí againn féin. Tuigim do chás leis an arán, mar sin féin, níor bhlais mé é ariamh go dtí gur bhog mé go BÁC. Sampla den leagan cáca (gan aon ghiosta) den bháirín anseo http://www.foodireland.com/recipes/Bakery/Irish_Barm_Brack.htm

    ReplyDelete
  4. San oideas a'msa, níl aon tae ach oiread. An bhfoilseofá d'oideas? Ba mhaith liom é a thriail!

    ReplyDelete
  5. Ón léamh atá déanta agam, tá seans ann gur nós Dublinneach é an tae a bheith mar chomhábhar sa bhairín breac. Is cuimhin liom mo mháthair, go ndéana Dia maith di, agus í chomh tíosach sin gurbh ar éigin a bhí rud ar bith mar dhramhaíl aici. Má bhí braon tae fágtha i ndiaidh béile, ba ar an rúbarb lasmuigh den chúldoras a chaití an tae maille leis na cnámhóga tae. Seans, mar sin, go gcaití farasbarr tae isteach leis na comhábhair eile agus bairín breac á dhéanamh aici. Sin ráite, áfach, sé is glé is cuimhin liom ná an bairín a cheannaítí thíos faoi gcathair i siopa i ngar do Cleary’s. Bhíodh nithe de leithéid fáinne, leathréal agus píosa guail, iad fillte i bpáipéar, folaithe ann.

    ReplyDelete