Saturday, November 10, 2012

Caithigí Uaibh Na Piollairí


Well, bhí a fhios agam le fada an lá go raibh sásamh nach beag le baint as an ngarraíodóireacht, ach seo chugaibh píosa eolais a threisíonn an bharúil sin.  N’fheadar an eol daoibh, ach roinnt mhaith de na frithbheathaigh (antibiotics) a úsáidtear i míochaine daonna agus ainmhí, is i mblúirín ithreach a fuarthas den chéad uair iad.  Anois, áfach, tá trí ghrúpa eolaí tar éis a thuairisc go bhfuil baictéar ar leith a fhaightear go forleathan i mám ithreach, baictéar darb ainm Mycobacterium vaccae, a ghríosaíonn an corp chun breis séireatoinin a dhéanamh.  Agus, ar ndóigh, tá a fhios ag madraí an bhaile gurb é séireatoinin hormóin an tsonais.  Ní gealta iad na heolaithe sin, ná ‘huggers’ ach an oiread.  Gabhaigí misneach a chairde, téigí amach, tóg mám ithreach id lámha, cuimil é, bolaigh é, cogain blúirín de más maith leat, (ach ní gá sin).  Tá oiread agus is gá de Mycobacterium vaccae análaithe isteach agat cheana féin.  Anois, ní gá duit ach feitheamh ar an sonas, ar an áthas a theacht anuas ina chaise ort. 
Google nó Bing ainm an bhaictéir go bhfeice sibh gur fíor a deirim, gan aon agó.

5 comments:

  1. bhí a fhios agam go raibh fáth ann gan an teach a ghlanadh.

    ReplyDelete
  2. Cé nach duine mór 'lámha san ithir' mé féin, tá sé tugtha faoi deara agam, thar na blianta, gur daoine sách sona, agus an-chairdiúil cineálta, iad na garraíodóirí sin a casadh orm ar bhóthar an tsaoil..:-)

    ReplyDelete
  3. Rachaimid uilig i gcré gan chré, mar sin? Tá ciall leis.

    ReplyDelete
  4. Suimiúil an rud é go n-admhaítear anois go bhfuil ceangail idir ró-glaine teaghlaigh agus méid na n-ailléirgí a tholgann páistí an teaghlaigh sin. Ní hionann sin is a rá gur sa láib ba chóir na páistí a bheith de shíor, ach go bhfuil an síorthóir ar an íonacht tí ag déanamh dochair do leanaí.

    ReplyDelete
  5. Cad tá againn ar ‘Freudian Slip’ i nGaeilge? Uaimh in áit Uaibh!!!

    ReplyDelete