Saturday, July 2, 2011

Molta ag Titley!!

Is annamh, dar liomsa, a bhíonn an focal moltach ag Alan Mór Fionn Titley, údar arbh fhearr leis bheith ag feannadh agus ag sciolladh ná ag moladh, ach le fíordhéanaí leath sé moladh agus tuilleadh ar shaothair Bhreandáin Ó Doibhlin as na sé faisiscil de ‘Manuail de Litríocht na Gaeilge’ a bhfuil an ceann deireanach foilsithe le fíor déanaí. Caith súil ar alt dar theideal ‘Doras Feasa’ le Titley san Irish Times.

Is fada Ó Doibhlin ar mo ghearrliosta de scothúdair Gaeilge, ní hamháin as na Manuail ach as na haistriúcháin a rinne sé go Gaeilge ar shamplaí de litríocht na Fraince agus as na nua-uirlisí critice a dhíriú ar an nGaeilge. Tá Fraincis measartha maith agam, nó sin a mheas mé, ach nuair a cheannaigh mé aistriúchán Ui Dhoibhlin ar Fabhalscéalta La Fontaine cuireadh ar mo shúile dom go raibh mo ghreim ar an teanga sin fabhtach go leor. Agus thairis sin nuair a léigh mé Néal Maidine agus Tine Oíche agus Aistí Critice agus Cultúir thuig mé den chéad uair cé chomh haineolach is a bhí mé i réimse litríocht na Gaeilge.

Mar a deir Titley sa alt úd, más spéis duit stair na hÉireann agus litríocht na Gaeilge agus mura bhfuil na Manuail ar do leabhragán níl ionat ach soidéalach.

4 comments:

  1. Nó bochtán!

    Sciar acu agam, ach bearnaí fós sa chnuasach.

    ReplyDelete
  2. Cheannaigh mé Aistí Critice agus Cultúir i bhfad ó shin, ach ní raibh mé riamh in ann é a léamh. LitCrit = leadrán i mo leabharsa. Caithfidh gur Filistíneach mé.

    ReplyDelete
  3. Well, Dennis agus Cruáil, beidh orm An Cosantóir a chosaint ar bhur ndímheas i leith na Critice Litríochta. Trua liom sin, mar i gcás Dennis féin tá ardmheas aici air agus ba dhoiligh liom aon smál a theacht ar an meas sin. Sin ráite agam, áfach, bhí sé thar a bheith deachair ormsa aon chiall a bhaint as disciplín na critice agus mé ag cur aithne ar an gCosantóir den chéad uair. Agus an mheánscoil críochnaithe agam, níor leag mé súil ar a dhath de ‘litríocht’ i dteanga ar bith gur bhuail mé léi. Agus níor tháinig aon smid de thuiscint chugam ach beagán ar bheagán agus nílimse ag maíomh ar chor ar bith gurb iomlán mo thuiscint anois. Ach is modh de mhodhanna an chritic chun tuiscint agus taitneamh a bhaint as píosa litríochta agus chun modh oibre an údair (pé acu an léir dó féin é nó nach léir) a fheiceáil. Mar fhocal scoir ar an ábhar seo, ó mo thaithí féin ar léirmheasanna/léirmheastóirí agus criticí/criticeoirí, bhain mé an tairbhe ba mhó as critic dhomhain fhíochmhar ar shaothar liom a chuir Bord na Leabhar Gaeilge (nach maireann) ar fáil dom. Léasadh cruthanta a bhí ann, gan taise, gan trócaire agus beidh a rian orm go lá mo bháis.

    ReplyDelete