Saturday, June 11, 2011

An Focal Neamhspleách

Ó am go chéile bíonn ceist ag duine dem lucht aitheantais faoin úrscéal atá in ainm a bheith idir lámha agam. An tríú scéal sa tsraith “Seán Ruiséal agus…………” atá i gceist agam. Go hiondúil, seachnaím freagra díreach a thabhairt, ach measaim go bhfuil sé in am dom an scéal a leagadh os bhur gcomhair.

Go nuige seo ba é a tharlaíodh go dtagadh smaoineamh suimiúil nó idé chugam agus tar éis breathnú air ar feadh scaithimh agus teacht den bharúil go raibh mianach scéil ann, thosaínn ag sníomh plota mórthimpeall air. Ba le linn dom bheith díreach dulta im luí istoíche a dhéanainn an sníomh agus ní thosaínn ar an scríobh go mbeadh geall le bheith chuile ghné den scéal leagtha amach agam.

OK, bhí go maith agus ní raibh go holc, ach agus mé sáite go domhain i scríobh an tríú scéal, tharla rud nach raibh coinne agam leis; thosaigh na focail ag dul i dtreo nach raibh mé sásta a leanúint. Chuir sin stop leis an scríobh agus sin cuid den fáth go bhfuil mé an oiread sin gafa leis an ngarraíodóireacht faoi láthair, óir caithim mo chuid fuinnimh a chaitheamh in áit éigin.

Mheas mé gurbh ait an rud é an scaradh sin idir mé féin is focail/plota an scéil agus chuir mé ceist ar dhuine dem lucht aitheantais, duine ar sár-údar é, ar tharla a leithéid agus é i mbun scríofa. “Go rialta,” ar sé, ach nílimse sásta fós mo cheannas ar an bplota a ligean le sruth. Agus sin daoibh, a chairde, staid mo chuid úrscéalaíochta faoi láthair.

8 comments:

  1. Deirtear go bhfuil aigne dá chuid féin ag an neamh-chomhfhios.

    ReplyDelete
  2. Chuala mise é sin, freisin, a Dennis, agus is minic é cloiste agam ó scríbhneoirí, a SheáinO, go n-imíonn scéal nó dán ina threo féin, agus go leanann siadsan an scéal nó dán, go minic.

    É sin ráite, tá do bhealach féin agatsa, agus is leis an mbealach sin a chloíonn tú mar go n-oibríonn sé duit. Go n-éirí leat!

    ReplyDelete
  3. Nach bhfuil úrscéal bunaithe ar muirthéacht seo na gcarachtar ag Flann Ó Brien? Snámh Dhá Éin, sílim!

    Go n-éirí leat, pé scéal é.

    ReplyDelete
  4. Is mar neach beo scéal dea-chruthaithe; ní nach ionadh go músclaítear a thoil tar éis tamaill.

    ReplyDelete
  5. This comment has been removed by the author.

    ReplyDelete
  6. Ar eagla na míthuisceana, níl an t-úrscéal caite i dtraipisí agam. Níl ann ach go bhfuil díospóireacht, díospóireacht bhríomhar ar uaire, ar siúl idir mé agus na focail. Ar ndóigh, tá an ceart ag Dennis agus agaibhse eile a thuigeann gur sa neamh-chomhfhios atá an mhalairt plota neadaithe. Go deimhin, is dóiche ná a mhalairt go n-eascraíonn an dá phlota ón réigiún céanna. Má thagann toradh inghlactha ar an díospóireacht, fillfidh mé ar an úrscéal, ach mura dtagann, fásfaidh caonach air agus diaidh ar ndiaidh rachaidh sé as amharc, as cuimhne, as bith.
    Dála an scéil, agus é luaite ag Aonghus, ba chóir dom a admháil go bhfuil “At Swim-Two-Birds” ar na húrscéalta is ansa liom agus é léite agus athléite agam cá bhfios ca mhéad uair. Seans go bhfuilim ionfhabhtaithe ag/leis/ an scéal céanna?

    ReplyDelete
  7. Tuigim do chás, a Sheáin. Tabhair am dó, tiocfaidh sé i gceart.

    Ag súil go mór leis an tríú leabhar sa tsraith a léamh. Bhain mé an-sult as an chéad dhá cheann!

    ReplyDelete
  8. arra, just cuir Joyce ort féin - nach bhfuil Bloomsday buailte linn?

    ReplyDelete