Thursday, October 28, 2010

Duilleoga




An tráth seo bliana agus mé am’ ghléasadh féin, féachaim amach ar an ngairdín cúil agus is éard a fheicim ná saibhreas, go díreach mar atá an scéal san dá phictiúr thuas. Baileoidh mé na duilleoga faoi thrí sula mbeidh deireadh leo. Uair a chloig go leith a thógfaidh gach iarracht agus carnfaidh mé ag bun an ghairdín iad. Mo chomharsana béal dorais, tá nós ar leith ag gach duine daoibh. An chomharsa ó thuaidh, séidfidh sé go bun a ghairdín iad, mar a bhfuil ‘terra incognita’ aige, fásra chomh tiubh sin nach féidir siúl tríd. An chomharsa eile, is baintreach í agus conradh aici le comhlacht garraíodóireachta a bhearrann an féar ó earrach go Samhain agus a bhaileoidh na duilleoga nuair a bheidh siad go léir tite. Ar ndóigh, tá nósanna eile ann chun fáil réidh leis na duilleoga céanna, ar a bhfuil iad a shá i málaí móra agus a iompar go dtí ionad athchúrsáil an bhaile. Ionann sin is a rá gur saibhreas domsa iad ach gur núis iad dá lán. Trua sin, mar ainneoin gach a léann tú i leabhartha garraíodóireachta, ní gá mórán stró a chur ort féin chun múirín a dhéanamh. In ionad bheith ag tiontú agus ag meascadh a bhfuil agat sa chró múirín, fad is a thógtar i gceart an carn, sé sin le sraitheanna caola d’fhéar agus duilleoga agus dóthain uisce lena choimeád tais, beidh múirín agat i gceann dhá bhliain agus ní bheidh ort ‘potting soil’ nó ‘top soil’ a cheannach le teacht an earraigh.

3 comments:

  1. ‘terra incognita’ aige, fásra chomh tiubh sin nach féidir siúl tríd.

    “Dufair na racún” thugaimse ar phaiste mar sin atá agam.

    ReplyDelete
  2. Agus caife meilte, blaoscannaí uibhe (agus an bosca), bruscar ó ghlasraí, srl.

    ReplyDelete
  3. Dennis: Tá trí mhadra ag an gcomharsa ó thuaidh uaim, Labs dubha iad, agus ní leomhann siad teannadh leis an dufair úd. N’fheadar an bhfuil racúin inti ach an tráth seo bliana ní bheadh ionadh ar bith orm dá mbeadh púca nó dhó i gceist.

    Seán: Ní oireann méid na gcró do leithéid “caife meilte, blaoscannaí uibhe (agus an bosca), bruscar ó ghlasraí, srl.” Tá carn eile agam, ceann measartha beag a dtéann gach rud oiriúnach seachas féar agus duilleoga ann. Is uaidh a fhaighim an múirín is mine.

    ReplyDelete