Thursday, September 30, 2010

Aguisín le Bronnadh na nDuaiseanna

Tá an píosa thíos ró-fhada le bheith ceangailte leis an téad faoi ‘Achaidh Aislinge’ agus dá bharr sin is mar theachtaireacht nua a fhoilseoidh mé é. Sibhse a sheol saothar isteach ach nach bhfuair duais ar bith, bíodh a fhios agaibh go raibh ceithre shaothar seolta agamsa, bliain i ndiaidh bliana, sular bhuaigh mé rud ar bith.

Ní raibh mise i láthair ag bronnadh na nduaiseanna i gcomórtas liteartha an Oireachtais ach an t-aon uair amháin. B’in sa bhliain 2006 nuair a roinn m’úrscéal ‘Seán Ruiséal agus Iníon an Oileáin’ an chéad duais le saothar le Maidhc Dainín Ó Sé. Agus deireadh leis an searmanas, tháinig an bheirt a bhí mar mholtóirí ar mo scéal chun labhairt liom. Ansin bhrúigh bean agus ansin bean eile isteach sa chomhrá. Iad beirt bainteach le comhlachtaí foilsitheoireachta agus suim acu an scríbhinn a léamh. Gheall mé cóip a sheoladh don chéad bhean díobh. Níl fúm anseo a thuilleadh a scríobh faoin scéal sin seachas a rá nár fhoilsigh ceachtar den dá chomhlacht an t-úrscéal.

I ndeireadh na dála sheol mé an scríbhinn chuig Pádraig Ó Snodaigh agus ghlac sé léi. Tá ábhar ghearrscéil ghreannmhar sa chur agus cúiteamh, comhfhreagras, easaontas agus, sa deireadh, maslú a bhain le diúltú na scríbhinne. (N’fheadar an mbeidh sé de dhánaíocht ionam an cur síos sin a scríobh.) OK, sa deireadh, d’éalaigh mé ón mbeirt agus d’fhill ar mo chol ceathrar a thionlaic mé an oíche sin. Agus muid ar tí imeachta, tháinig bean óg chugam agus d’iarr orm dul go seomra eile le haghaidh agallaimh raidió. Faoi am sin, áfach, bhíothas críochnaithe leis na hagallaimh agus ar ais liom go dtí mo chol ceathrar, a bhí faoin am sin ag labhairt leis An Snodach agus a chéile Clíona Cussen. Anois, sé an fhírinne ghlan é go raibh luath-leagan de scríbhinn an úrscéil chéanna seolta agam chuig Coiscéim geall le bheith bliain roimhe, ach focal níor chualas ina thaobh agus chinn mé nach raibh aon tairbhe le bheith ag iarraidh míniú ó Phádraig.

2 comments:

  1. An bhfuil "Martin Eden" le Jack London léite agat? Cuid den phrintíseacht is ea an diúltú ó foilsitheoirí!

    ReplyDelete
  2. Sin mo thaithí féin ar chúrsaí, freisin (ach níos lú déanta agam agus níos lú dóchais agam!). Mar a dúradh, "Oh I could tell ya blood curdlin' tales...! (ach an tart, an tart...).

    ReplyDelete