Saturday, April 17, 2010

“Taibhse Préachán”

Le blianta beaga anuas tá muid sna bólaí seo faoi léigear ag fianna. Tá méadú as cuimse tagtha ar a líon agus ós rud é nach bhfuil sé PC iad a mharú ach faoi choinníollacha thar a bheith srianta, tá cead a gcinn acu dul cibé áit is maith leo. Luaigh mé le déanaí go bhfuil ceapach lán de Trillium agam i mo scáthghairdín agus mé ag iarraidh iad a chrosphailniú féachaint an mbeadh teacht agam ar chineál nua. Well, dhá bhliain ó shin rinne na fianna scrios aon oíche ar na Trillium (Trillia??) sa chaoi nach raibh bláth ar bith fágtha. Ní raibh mé sásta fál d’ocht dtroigh a chur thart ar an gceapach, ach cheap mé nach raibh an dara suí sa bhuaile agam go dtí go bhfaca mé fógra i iris garraíodóireachta. Fearas thar a bheith cliste é a bhfuil trí chinn ceannaithe agam anois. Ceanglaítear osán uisce le spréire a bhfuil brathadóir neasachta (proximity detector) mar cuid de. A luaithe a thagann neach beo, go fiú siopmonc, i bhfogas 30 troigh den bhrathadóir, spréitear rois uisce ina threo. Stua de thart ar 120° atá ag an mbrathadóir agus an spréire ar aon. Ainneoin gur loiteadh ceapacha eile, níor baineadh leis na Trillium, ní anuraidh, ní i mbliana. Ceann eile suite agam anois chun na piseanna, na biatais agus na súnna talún a chosaint. Is gá cadhnra naoi volta a chur sa bhrathadóir ach maireann ceann amháin díobh siúd feadh an tséasúir. Aoibhinn an teicneolaíocht ar uaire.

7 comments:

  1. Ag dul i ngleic leis an nádúr go nádúrtha, agus go cineálta - maith thú, a chara!

    ReplyDelete
  2. Léigh mé chomh fada le “fearas thar a bheith cliste”, smaoinigh mé ar an shishi-odoshi agus chuireas an cheist seo orm féin: “An féidir go bhfuil a leithéid éifeachtach dáiríre?” Áthas orm gur aimsigh tú gaireas atá in ann ag na fianna!

    ReplyDelete
  3. Súil agam ná fuil bóthar ná cosán i ngiorracht 30 troigh dén bhrathadóir diabhalta úd.

    ReplyDelete
  4. Tá cosán taobh leis an gceapacha. Má theannann tú leis an ngaireas óna chúl, féadann tú an rud a chur as feidhm, na ceapacha a iniúchadh agus a shiúl agus plandaí nua a chur iontu. Ar chríochnú duit, teannann tú leis an bhfearas arís agus cuireann tú ag obair arís é. Simplí go leor agus thar a bheith éifeachtach. Níl ar chumas na bhfianna na plandaí sna ceapacha a aimsiú ach ón t-aon slí amháin, treo na roise!!!!!!!!!!!!

    ReplyDelete
  5. Sea, tá an dealramh ar an scéal go bhfuil fuascailt éifeachtach faighte agam ar fhadhb na bhfianna. Ach ar eagla go mbeadh aon mhíthuiscint ann faoi mo dhearcadh ar na hainmhithe céanna, dá mbeadh sé de chead agam iad a lámhachadh, dhéanfainn é gan trua gan taise. Seachas an corrtheach a bhfuil a ghairdín go hiomlán iata ag fál ard, níl garraíodóir ar an mbóthar seo ‘gainne nach bhfuil de shíor á chiapadh ag na fianna. Is iomaí séitéir a mhaíonn go bhfuil fuascailt na faidhbe aige: fual mic tíre, fuil bó nua-leagtha, Capsaicin, gallúnach “Irish Spring” arna chrochadh ó ghéaga crann. Tá comharsa agam a bhfuil triail bainte aige as gach ceann de na fuascailtí seo agus faic de thoradh aige ar gach iarracht. É anois tar éis cúpla ceann de na Taibhsí Préachán a cheannach tar éis gur inis mo chéile dá chéile faoin bhfearas atá agamsa. Buiséal úll geallta aige dom mar éiríonn leis na Taibhsí. Anuraidh d’ith na fianna go fiú na húill a bhí ina líon, go díreach mar a d’ith siad na piorraí ar mo chrann féin. Cineálacha miona den chuid is mó a bhíonn sna crainn torthaí sna bólaí seo.

    ReplyDelete
  6. Nach ndéanfadh madra maith cúis?

    ReplyDelete
  7. Madra maith? Dhéanfadh, cinnte. Ach daoibhse nach bhfuil eolas cruinn agaibh ar an sórt tithíocht atá againn anseo ar imeall an bhaile bhig seo caithim a chur ar bhur súile daoibh nach bhfuil fál nó balla nó aon ní dá shórt ag rianú an teorainn idir mo phíosa talún agus talamh mo chomharsan. Ar ndóigh tá comhthuiscint eadrainn cá bhfuil an teorainn sa mhéid go mbearraim an féar a fhad le líne áirithe. Thairis sin bheadh suirbhé proifisiúnta de dhíth orainn agus sin a dhéantar nuair atá teach le díol. Le himeacht ama, áfach, téann na cuaillí ar strae agus filltear ar an gcomhthuiscint. Tá cosc docht ar mhadra a scaoileadh saor am ar bith agus má tharlaíonn a leithéid ní thugtar ach an t-aon rabhadh amháin don úinéir. Na póilíní a thagann as sin amach. D’fhéadfaí sreang reatha (running line) a shíneadh ag bun an ghairdín agus iall an mhadra a cheangal leis, ach ní dhéanfadh na fianna ach bealach isteach eile a aimsiú trí ghairdín mo chomharsan. Só, níl fágtha againn ach cúpla seift; gunna, (mídhleathach) nó fál d’ocht dtroigh, nó ar ndóigh an Taibhse Préachán.

    ReplyDelete