Friday, April 9, 2010

An Garraíodóir Eile

Sé céile ‘Mise Áine’ ‘An Garraíodóir’. Fágann sin gur mise ‘an garraíodóir eile’ agus seo mar atá an scéal agam go nuige seo. Tá piseanna ag péacadh sa cheapach ardaithe nua agus nuair a bheidh mé réidh leosan, beidh trátaí á gcur ina n-áit. Thart ar sheasca lá ó chur na síol go baint an bhairr, sin a bheidh ó na piseanna. Beidh dhá shaghas tráta agam: ceann len ithe láithreach agus ceann de shaghas ‘Roma’ a ndéanfaidh mé anlann astu. Cuimhnígí gur pósta le hIodálach-Mheiriceánach atá mé. Tá ceapach nua sú talún curtha agam agus an-bhorradh fúthu, ainneoin nach bhfuil ann ach seachtain ó chuir mé i dtalamh na 25 plandaí. Líne amháin de bhiatas rua ag imeall na ceapaí sin. Leis an mbreis solas gréine atá ann de bharr baint na gcrann, a bhuí do Chosantóir na mBilí, tá giolcaigh na súnna craoibhe ag léim as an talamh agus beidh ár gcéad béile asparagais againn amárach. Na ceapacha ina raibh na prátaí ag fás anuraidh, táid clúdaithe anois le plaisteach dubh agus beidh siad á mbácáil agam feadh an tsamhraidh, mé ag súil go scriosfar an Phytophthera infestans roimh theacht an fhómhair. Ar an taobh eile den ghairdín tá scáthghairdín de cheithre cheapach agam, na cinn is sine agam. Raithnigh iomadúla i gceann amháin, Trillium de shaghsanna éagsúla i gceann eile, Helleborus (earrach) agus Tricyrtis miyazaki (fómhar) sa tríú ceann agus Arisaema agus Geranium fiáine sa cheann deiridh. Tugtar ‘Jack in The Pulpit’ ar Arisaema sna bólaí seo, ach ar na hainmneacha atá ag na Gaeil ar an bplanda seo tá “Bod Madra”, ainm nach bhfeicfidh tú ar an stampa poist Éireannach. Agus sin agaibh é, a chairde. Ach fan nóiméad. Píosa eile nuachta agam daoibh. Tá na beacha fiáine fillte le cúpla lá agus an crann piorra ar tí bláthú.

Aoibhinn beatha an gharraíodóra!!

7 comments:

  1. Níl raibh a fhios agam gur Iodálach-Mheiriceánach atá i gCosantóir na mBilí, bail ó dhia urithi. Tagann na fíricí amach de réir a chéile.
    ;-)

    ReplyDelete
  2. Aiféala orm faoin ainm sin a ghoid, a Gharraíodóir Eile, a chara!

    Ón méid atá léite agam ar do bhlag go dtí seo, is mó i bhfad atá an t-ainm 'Garraíodóir' tuillte agatsa ná mar atá ag mo chéile na laethanta seo, slán a bheas tú!

    Mar a tharlaíonn sé, níl garraí de shaghas ar bith againn i gCeann Scríbe, ach beidh gabhdán plandaí nó dhó á gcur againn go luath – nó, ahem, á gcur aigesean, is cirte a rá.

    Nach iontach gur fhill na beacha fiáine! An mbeidh mil le fáil agat uatha?

    Mar is léir, níl cur amach iontach agamsa ar chúrsaí garraíodóireachta, ach tá ar mo Gharraíodóir féin…;-)

    ReplyDelete
  3. Ar an drochuair, Áine, ní thálann na beacha fiáine mil. Is beacha aonaránacha iad agus siad na beacha baineannacha a dhéanann an obair go léir. Níl ó na cinn fireannacha ach a bheith ag bualadh leathair agus ag siamsaíocht. Is pailneoirí iad na beacha baineannacha. Bailíonn siad pailin agus neachtar agus cuireann i bhfolach iad sna tiúbanna bambú atá agam ar bhalla an gharáiste. Nuair a bhíonn a ndóthain acu, beireann siad cúpla ubh le hais an bhia agus cuireann séala láibe ar an gcuid sin den tiúb. Déantar sin arís is arís eile go mbíonn an tiúb líonta acu. I dtólamh, faoin am sin, bíonn an créatúir traochta amach is amach agus titeann siad marbh. Mar a dúrt, tá an crann piorra ag bláthú agus na beacha ar a ndícheall á phailniú. Dála an scéil, tá mé breá sásta bheith im ‘gharraíodóir eile’.

    Dennis: Fiondella is sloinneadh di. Ionann sin agus 'ding bheag'.

    ReplyDelete
  4. Nach suimiúil é modh oibre na mbeach!

    Maidir leis an Arisaema, agus is suimiúil an t-ainm sin 'Bod Madra' caithfidh mé a rá, tháinig mé ar an bpíosa seo in Wikepaedia

    "One unusual trait shared by all Arisaema species, and not those of other genera, is the sex change. Arisaema plants are typically male when small, and female or hermaphraditic when large, with a single plant capable of changing sex based on nutrition[1] and genetics,[2] and perhaps changing sex several times during its long life (20 years or more)"

    Táim ag foghlaim liom...

    ReplyDelete
  5. Táimidne an-déanach i mbliana ag cur inár ngarraí-ne. Ach seo an tríú bliain ó chuireamar asparagas agus tá fíor-asparagas ag fás don chéad uair riamh! Táimid an-sásta faoi sin.

    ReplyDelete
  6. Sin díreach é i gcás an asparagais. Trí bliana sula mbaintear barr, ach as sin amach beidh barr agat gach bliain. Beidh mo cheapach asparagais ina beo fós agus mise faoin gcré le fada an lá.

    ReplyDelete
  7. Ceista agam ort - an éiríonn siad níos tiuibhe agus iad ag fás? Feicim go éiríonn siad réasúnta ard go tapaidh, agus an-difear eatarthu maidir lena dtiús. Sílim gur bhain mo bhean cúpla ceann go ró-luath. Ach níl aon taithí agam orthu!

    ReplyDelete